Autodeterminazioaren alde, baldintza demokratikoak lelopean, auto karabana abiatuko da abenduaren 20an, Tabiratik, 19:00etan; 20an, berriz, manifestazioa, Txiki Otaegitik, 19:30ean. Antolatzaileen berbetan, Euskal Herriak une berezia bizi du eta “gatazka konpontzeko aukera ezin hobea da”. Baina, “ezinbestekoa” deritze herritarrak prozezuaren “protagonista” izateari: “Euskal Herritarroi dagokigu berba eta erabakitzeko eskubidea”.
Baldintza demokratikoak “ezinbestekoak” direla nabarmendu dute: “Egoera gogorra da; egunik egun eskubideak ukatzen zaizkigu”. ETAren su-eten iraunkorretik, “inguruko 7 lagun izan dira Audientzia Nazionalean eta durangar bi epaitu dituzte; lagun bat atxilotu dute; mobilizazioetan 7 lagun identifikatu dituzte eta 3 gazte jarraipen etengabean izan dira; hilabetean 31 kontrol izan dira, gutxienez; bost laguni isunak (30.000 euro batuz)…”. Gatazka konpontzeko “indarrak batu” behar direla nabarmendu dute.