Saskibaloiko Lehenengo Erregional Mailak nagusi argi bat du aurten: Anbotopeko. Orain arteko hamar partidak irabazi dituzte eta Autonomia Arteko Mailara igotzeko hautagai nagusiak dira.
Partidak joko erasokorraren bidez erabakitzen dituzte, “kalitatezko jokalariak baititugu”, Maren Hormaetxea entrenatzailearen esanetan: “Goragoko mailetan aritutakoak dira bat baino gehiago, eta hori igarri egiten da. Ez gara talde ikaragarri taktikoa; baina erasoan baliabide ugari dugu, jokalarien kalitateagatik”.
Horiek horrela, partidetan erritmo bizia jartzen saiatzen dira, bai baitakite joan-etorri azkarretan aurkariak baino eraginkortasun handiagoa izango dutela. Hamar partidatan 767 puntu egin dituzte; sailkapenean bigarren dagoen Galdakaok baino 153 gehiago, eta punturik gehien lortu duen bigarrena den Balmasedak baino 99 gehiago. Nolanahi ere,tartean partida zailak izan dituzte. Lehen jardunaldian Balmasedarrei 70-76 irabazi zieten, eta zapigarrenean, lau puntuko aldearekin gailendu zitzaizkien Romoko Ezkorak-ekoei (74-78).
Adin tarte zabala
Taldea adin guztietako jokalariek osatzen dute. Helduena Hormaetxea bera da, 32 urterekin; 20 urte ingurukoak bat baino gehiago dira, eta gehienak 24tik 28ra artekoak. Beraz, esperientzia eta gaztetasuna, biak ditu Anbotopekok. Gainera, aurten jokalari gazte berri bi dituzte: Ander Zarraga eta Endika Iparragirre durangarrak.
Mailaz igoz gero, Hormatxeak argi du “beste konpromiso maila bat” eskatu beharko litzatekeela, batetik, Euskal Herri osoko eta Errioxako taldeen kontra jokatu beharko luketelako; bestetik, ekonomikoki ere “babesle gehiago aurkitzen saiatu beharko ginateke”.
Bihar Mungiaren kontra jokatuko dute, kanpoan, eta partida gogorra aurreikusten duen arren, irabaztera joango direla dio.