Kulturalak jardunaldi bi jokatu ditu etxean jarraian, eta liga hasiera kaskarra zuzendu beharrean, taldeak dituen gabeziak agerian gelditu dira. Atzealdean hutsegite larregi egiten ditu, bere sendotasun izaera galduz; joko aldetik, berriz, urduri dabiltza jokalariak, erasoan erreferente argirik gabe. Durangarren aurtengo helburua lortzeko (sailkapeneko lehenengo postuak), ezinbestekoak ziren, gutxienez, lau puntu. Santurtzik hiru lapurtu zizkien, ordea, eta zapatuan puntu bakarra lortu zuten. Beasainen aurkako partidan bana egin eta puntua azken minutuan lortu zuten. Partidak bi zati izan zituen Ricardo Txintxurreta entrenatzailearen esanetan: “Ondo hasi gara, baloiaren kontrola izanez eta aukerak sortuz. Baina hutsegite batean aurrea hartu digute. Atsedenaldian, lasai jokatzeko esan diegu; garaipena posible zela”. Kontrakoa gertatu zen. Lehenengo zatiko joko ona, urduritasun eta zehaztasun falta bilakatu zen, eta liga hasierako mamuak itzuli ziren. Muruamendiarazek jokaldi isolatu batean lortu zuen berdinketa. Ligan lehenengoa egin zuen Arrasatearrak.
Ondorioz, jaitsiera postuak puntu bakarrera ditu Kulturalak: “Azken partidetan akats handiak egin ditugu. Urduri gaude eta emaitzari buelta ematea zaila da egoera horretan”.