Euskalmeten iragarpenaren arabera, tenperatura maximoak 35-40 gradu artean kokatuko dira gaur. Bero zakarra egingo du denean. Barnekaldean, bereziki. Hego-ekialdeko haizea egingo du. Arratsaldean, kostaldean, posible da brisa apur bat sartzea. Zeruan laino gutxi egongo da eta Euskalmetek ez du baztertzen han-hemenka trumoiren bat botatzea. Gaua beroa izango da ostera ere, eta tenperaturek antzeko joera izango dute bihar. Baso-suteak gertatzeko arriskua ere handia da, Euskalmeten berbetan.
Gomendioak
Osasun Sailak hainbat gomendio eman du muturreko tenperaturei begira:
- Likido asko edan, batez ere ura, deshidratazio-arriskurik ez izateko.
- Arreta berezia jarri haur txikiekin, adinekoekin eta beroak eta deshidratazioak areagotu ditzakeen gaixotasunak dituzten pertsonekin, esate baterako, bihotzeko gaixotasunak dituztenekin.
- Itxi leihoak eta pertsianak eguzkiak jotzen duen aldean, eta bero gutxien egiten duen uneetan freskatu eta aireberritu etxea.
- Aire zabalean kirola egin nahi izanez gero, bero gutxien egiten duen orduetan egin.
- Inoiz ez geratu eta inoiz ez utzi pertsona bat edo animalia bat aparkatuta dagoen ibilgailu baten barruan, itzalean egonda ere.
- Otordu arinak egin (entsaladak, gazpatxoa, barazkiak, fruta, etab.).
- Arropa egokia, lasaia, arina, kolore argikoa eta arnasa hartzen uzten duena erabili, eta oinetako erosoak eta freskoak.
- Saiatu kalera ez irteten bero handiena egiten duen orduetan.
- Atera beharra izanez gero, eraman burua estalita eta erabili eguzkitako betaurrekoak, eta ahal izanez gero itzaletik ibili.