Durangaldeko EH Bilduk zapatuan Bilbon egitekoa den manifestaziora joatera deitu du

EH Bilduk "Euskal Olatua altxatzeko" manifestazioa egingo du zapatuan Bilbon, eta Durangaldeko egiturak mobilizazio horretan parte hartzeko deia egin die eskualdeko herritarrei. EH Bilduren iritziz, "sistema kapitalista basatiak" hainbat ondorio ekarri ditu: "Elite ekonomiko batzuen mesedetan hartutako erabakiek eraman gaituzte egoera honetara: bankuak, elektrikak, multinazionalak... eta haiek inoizko irabazi handienak pilatzen dituzten bitartean, negurako prestatu gaitezela esaten digute, jakitun milaka familiek ezingo diotela etengabe eta era basatian gora doazen prezioen erritmoari eutsi". Egoera horren aurrean "esperantza aktiborako deia" egin du koalizioak, "ekaitzari aurre egingo bazaio, ezkerretik eta burujabetzatik izango delako". Egoera horren aurrean "soluzioak egon badaudela" aldarrikatuko du EH Bilduk.