Amankomunazgoak eta Durangaldeko eskolek Eskola Agenda 21 programaren hamalaugarren edizioa landu dute elkarrekin. Aurten, plastikoaren murrizketan eta ibai-erreken zainketan ipini dute arreta. Ikastetxeek dozena bat ideia ipini dituzte Amankomunazgoaren eskuetan. Horien artean daude, besteak beste, poltsa berrerabilgarriak herritarren artean doan banatzea, estalkia duten paperontziak jartzea haizearen eraginez zaborrak hegan egin ez dezan; errekak, kaleak eta hondartzak garbitzeko irteerak antolatzea edo udalerria garbitzeko boluntario-sarea sortzea.
Konpromisoak eta aurrera begirako planak
Amankomunazgoak jasangarritasunari lotutako hitzaldiak eta tailerrak antolatzeko konpromisoa hartu du bere gain. Plastikoak sortzen dituen arazoez kontzientziatu gura ditu herritarrak. Bestalde, gazteei zuzendutako ideia lehiaketa bat ipiniko du martxan, birziklatutako plastikozko produktuak sortzeko ideiekin.