Euskara 365 egunez erabiltzera bultzatuko duen "ikur bateratua" eskegiko dute Durangaldeko hainbat udaletxetan

Gaur, bihar, etzi... Durangaldean euskaraz bizi leloa duen ikurra sortu du Amankomunazgoko euskara batzordeak, haren parte diren udaletxeetan eskegitzeko. "Abenduaren 3a ospatzen dugu (Euskararen Nazioarteko Eguna), baina egun bakarreko aitortzatik haratago, urteko 365 egunetan egin beharreko erabilera da aldarrikatu nahi duguna", azaldu dute Amankomunazgoko iturriek.

Urte osoko erabilera bultzatzeaz gain, logoaren diseinuak Euskaraldiari ere egin gura dio erreferentzia. "Euskal hiztunak, herri aginteak eta askotariko gizarte-erakundeak aktibatu zituen ariketa" da Euskaraldia, "2019 eta 2020. urteetan jarraipena izango duena", diote. 

Amankomunazgoaren euskara zerbitzuko kide diren hainbat udalerritan egitarau berezia antolatu dute Abenduaren 3ko "aldarrikapenetarako eta ospakizunetarako".

Durangaldeko albiste garrantzitsuak edo azken ordukoak whatsapp bitartez jaso gura dituzu? Bidali ALTA 688 635 041 telefono zenbakira.