Bosgarren urtez, martxan da ANBOTOk antolatzen duen udako argazki lehiaketa

Bost urte pasatu dira ANBOTOk herritarren argazkilari senari bide eman eta udako argazki lehiaketa antolatzen hasi zenetik. Aurten ere, arlo bitan aurkeztu ahal izango dira argazkiak udako argazki lehiaketara: eskualdeko argazkirik onena eta eskualdetik kanpoko onena. Gainera, parte-hartzaileek munduko edozein tokitatik ipini ahal izango dituzte argazkiak anboto.org webgunera. 

Parte-hartzaile bakoitzak lau argazki aurkeztu ahal izango ditu gehienez, kategoria bakoitzeko bi, eta aurretik beste lehiaketetan saritu bakoak izan beharko dira. Argazkiok irailaren 15a baino lehen ipini beharko dira ANBOTOko webgunean (anboto.org). 

Arlo bakoitzean bina sari banatuko dira. Epaimahaiaren saria irabazten duen bakoitzak asteburu-pasa bategaz gozatuko du. Publikoaren sariaren kasuan, eskualdeko onenak Hiper Eroski Abadiñok emandako bozgorailua jasoko du. Eskualdetik kanpoko onenak, ostera, Databost enpresak emandako tableta.