Legebiltzarrak EH Bilduren proposamena onartu eta Durangoko etenik gabeko arreta guneko zerbitzua hobetzeko eskatu die Osasun Sailari eta Osakidetzari. Erizaintza zerbitzua indartzeko eskaera egin du “lan-txanda bakoitzean presentziazko bi erizain egon daitezen, ekitate eta efizientzia irizpideen baitan”.
“Durangoko etenik gabeko arreta gunea gutxienez 2013tik konpondu gabeko auzia dugu. 2014ko abenduaren 1ean Legebiltzarrak onartu zuen lan-txanda bakoitzean presentziazko erizain bat gehitzea, txanda bakoitzean bi erizain egon zitezen, baina Jaurlaritzak ez zuen Ganbararen agindua bete eta gaur da eguna erizain gehiagoren beharra agerikoa dena, Barrualde-Galdakao Erakunde Sanitario Integratuak ere aitortu bezala”, azaldu du Rebeka Uberak.