Ideien lehiaketa urriaren 1era arte egongo da zabalik. Ideia onena duenari 1.000 euroko saria emango diote, eta beste lauri 500 eurokoa. Iaz, esaterako, hamabi ideia aurkeztu ziren planean.
Bekei dagokienez, bost hilabeteko lan esperientzia izango da, %75eko lanaldian, eta 460 euro kobratzen. Ikasi duten arloan esperientzirik ez duten gazteek izango dute parte hartzeko aukera.
Berriz, Durango, Elorrio, Garai, Iurreta, Izurtza, Mañaria, Zaldibar eta Zornotzako alkateek parte hartu dute prentsaurrekoan. Pilar Rios Durangoko enplegu zinegotziak azaldu du proiektua. Informazio gehiago gura dutenek gaztedidurangaldea.eus atarira jo dezakete.
"Azken aukera"
EAJ eta EH Bilduko alkateak egon dira aurkezpenean, baina EH Bildu kritiko azaldu da ostean. Gaztedi Planari "azken aukera" emango diotela esan dute. Diotenez, "balorazio ezkorra" egiten dute planaren orain arteko ibilbideaz. "Txarto hasi zen, adostasunik bilatzeko inongo asmo barik eta eskualdeko errealitatea zein zen kontuan hartu barik". EAJ izan dute kritiken jomugan. "Amankomunazgoa kudeaketatik kanpo utzi zen, eta Durangoko Udalari eman zitzaion koordinazioaren ardura, interes partidistengatik". EH Bilduk azaldu du, hala ere, "gazteen egoera hobetzeko borondateari jarraiki", hitzarmena hobetzeko proposamenak egin zituela. Baina, bi bakarrik onartu ziren, ikasleentzako gutxieneko diru kopurua eta beken ikuskaritza egitea.