ANBOTOk Kudeaketa Aurreratuaren diploma jaso du

Jone Guenetxea 2017ko abe. 14a, 15:47

Donostiako Kursaalen diploma jaso zuen Jone Guenetxea ANBOTOren zuzendariak martitzenean egindako ekitaldian. Tokikomeko Baleikek, Goienak, Kronikak eta Ttipi Ttapak Topagunearekin batera errekonozimendu hori jaso dute. Arantxa Tapia Ekonomiaren Garapenerako sailburuak eta Jon Darpon Osasun sailburuak parte hartu zuten ekitaldian.

Azken bi urteotan kudeaketa arloan ahalegin berezia egin dute Tokikomen batzen diren hainbat tokiko hedabidek. Euskalitek emandako formazioaren bidez, kudeaketa aurreratuan sakondu dute, enpresa ikuspuntua eguneroko jardunean txertatuz. Horrela, Innobideak-Kudeabide programaren parte-hartzaile moduan, EUSKALITen Kudeaketa Aurreratuaren Euskal Saria eskuratu dute hainbat hedabidek, tartean ANBOTOk. Joan zen martitzenean Donostiako Kursaalean egindako ekitaldian jaso zuten errekonozimendu hori.

"Arlo guztietan eraginkorragoak izateko tresnak aurkitu ditugu Kudeaketa Aurreratuaren ereduan. Aurrerapausoak egin ditugun arren, hau hasiera baino ez da izan. Hurrengo urteotan arlo honetan sakontzea da helburua", azaldu du Guenetxeak.

 

 

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!