Kristina Mardarasek gidatuko duen ekitaldian ume zirela Gerra Zibila lehen pertsonan bizi izan zuten hainbat lagunek beraien testigantza azalduko dute jendaurrean. Eskarne Aroma durangarra, Iñaki Gorritxategi berriztarra, Felix Arruti iurretarra eta Maria Igarza elorriarra izango dira umetan gerra zelan bizi izan zuten kontatuko dutenak. Laurogei urtetik gora pasatu diren arren, pertsona hauek gerraren akordua argi-argi dute memorian grabatuta.
Urtero legez, Tronperri dantza taldeak aurreskua eta lore-eskaintza ere egingo ditu. Horrez gainera, Bidane Txopiteak eta Jasone Turunbaik Agurrik Gabeak kantua abestuko dute. Abesti honen letra Unai Iturriaga bertsolariarena da, eta Ander Ertzillak musikatuta dago. “Abestia denok batera kantatzea gurako genuke”.
Udaberririk ankerrena
Jarraian, Unai Iturriagak eta Alex Sanvik sortutako Udaberririk ankerrena komikian oinarritutako antzezlana taularatuko du Karrika antzerki taldeak. Komiki honetan, 1937ko martxoaren 31n Durangon eta Elorrion gertatutako bonbardaketak azaltzen dira, bi umeren ikuspuntutik.