Berton Bertokoaren alde, eskola kontseiluek Jaurlaritzara jo dute

Durangaldeko hainbat ikastetxetako guraso, ikasle eta irakasleak, Abadiñon ateratako argazkian.

Durangaldeko eskola publikoetan bertako eta sasoiko produktuak jatearen aldeko dinamikaren txispa guraso elkarteek piztu zuten, eta orain eskola kontseiluak batu dira. Dokumentu bat onartu dute, eta horren bidez, Berton Bertokoa dinamikaren eskaera posible egin ahal izatea eskatu diote Eusko Jaurlaritzari. Durangoko Zabalarrako, eta Elorrio, Berriz, Iurreta, Atxondo, Zaldibar eta Zelaietako (Abadiño) kontseiluek onartu dute aldarriagaz bat egitea. Durangoko Landakon eta Traña-Matienan irailean landuko dute gaia.

Bertakoa eta sasoikoa, eskoletako jantokietan bertan prestatzea eskatzen dute sustatzaileek. Eskola bakoitzari orain arteko eredu zuzena edo zeharkakoa garatzeko aukera ematea eskatu diote Jaurlaritzari, “aukera guztiei babes instituzional eta ekonomiko bera eskaini eta sukaldeko zein jangeletako langileen lan baldintzak errespetatuz”.

Hori posible bihurtzeko, ordea, beharrezkoa izango da Jaurlaritzak 2000. urtean sortutako legean aldaketak egitea. Ez daude ados eredu bakarragaz: “Ez gaude ados jantokiak kudeatzeko inposatzen duten eredu bakar eta baztertzaileagaz, non gure seme-alaben elikadura irabazi handiko negozioa egiteko erabiltzen duten enpresa pribatuek”.  Hain zuzen ere, enpresa horiek zigortu dituzte prezioak adosteagatik, eta zigorraren dirua jangelak egokitzeko bideratzea proposatu dute eskola kontseiluek.

Euren ustez, elikadura ezin da hezkuntzatik kanpo ulertu. “Umeak, jaten dutenaren arabera garatuko dira”

Durangaldeko albiste garrantzitsuak eta azken ordukoak Whatsapp edo Telegram bitartez jaso gura dituzu? Hauek dira bi aukerak.

WHATSAPP: Bidali ALTA 688 635 041 telefono zenbakira.

TELEGRAM: Batu zaitez @anbotokomunikabideak kanalera.