Ekainaren 26ko hauteskundeei begira, Herriaren Eskubidea alderdiak Podemosen aldeko kanpaina egin du Durangaldean. Horretarako, informazio mahaiak jarri dituzte Durangon, Berrizen, Abadiñon eta Elorrion. Mahai horietan hainbat mezu zabaldu gura izan dituztela azaldu du Julian Ríos Herriaren Eskubidea alderdiko zinegotzi durangarrak. Erabakitzeko eskubidea eskubide demokratiko bat dela azpimarratu du, eta horrek akordio zabalak eskatuko dituela.
Gobernatzeko modu tradizionalek ez dutela funtzionatzen azpimarratu du Riosek. Gaineratu duenez, “paradisu fiskaletan galtzen dena baino gehiago batzea lortuko bagenu, dirua izango genuke politika sozialetan inbertitzeko”. Politikako ate birakariei eta korrupzioari ere amaiera eman behar zaiela nabarmendu du.
Ingurumenari dagokionez, energia berriztagarrien eta ikerketaren alde egiten duten enpresen alde apustua egitea proposatzen dute.