Egin zaitez ANBOTOren Lagun eta babestu ezazu ANBOTOren komunikazio proiekua

Egin zaitez ANBOTOren Lagun eta babestu ezazu ANBOTOren komunikazio proiekua
20 komertziok parte hartzen dute ANBOTOren kanpainan

Urtean, 30 euroren truke, Anbotoren Lagunen txartelagaz hainbat hobari eta deskontu eskaintzen dizkizu ANBOTOk

2002an Anbotoren proiektua sortu zenetik, hainbat eragile eta herritarren laguntzagaz egin du aurrera Durangaldeko Herri Komunikabideak. Euskaraz informatzea helburu duen ANBOTOk ezinbestekoa du herritarren laguntza bere proiektuarekin aurrera egin eta barikuro-barikuro ale berri bat ateratzeko.
Laguntza hori ematen duten lagunei nolabait eskerrak emateko asmoagaz, eta herritar gehiagori proiektuan beraien aletxoa jartzeko gonbidapena eginez, azken hilabete hauetan, ANBOTOk kanpaina berria jarri du martxan.

Anbotoren Lagun
Azken hilabete hauetan, Durangaldeko Herri Komunikabidea proiektuari babesa emateko martxan jarri duen Anbotoren Lagunen kapaina aurkezten dabil bere lekuan lekuko harpidedunen artean. Urtean, 30 euroko babesaren truke,  ANBOTOk abantailaz beteriko txartel bat banatuko die laguntza hori ematen dioten herritarrei, Anbotoren Lagunen Txartela, hain zuzen.

Abantaila ugari
Anbotoren Lagunen Txartelak hainbat  abantaila eskaintzen ditu. Txartel honegaz, Durangaldeko zein eskualdez kanpoko hainbat saltoki eta zerbitzutan berau erakutsi eta deskontu bereziak jasotzen dira.
Txartelaz gain, hilero, Anbotoren Lagunentzat oparien zozketa bereziak egiten dira.   
ANBOTOn argitaratzen diren iragarki laburretan eta eskeletan ere deskontuak jasoko dituzte proiektuari urteko kuota horregaz babesa ematen diotenak.
Eta, horretaz guztiaz gain, ANBOTOk urtero ateratzen duen Egutegia eta Turismo gida ere emango zaie Anbotoren Lagun egiten direnei.

Nola egin lagun
Astekariaren proiektua babestuta abantailak lortu nahi dituztenek, oraintxe dute aukera, modu erraz batean, Anbotoren Lagun egiteko. Harpidedunek ANBOTOren telefono deia jasotzen dutenean aukera izango dute kanpainarekin bat egiteko.
Kanpainan parte hartzeko hauek dira aukerak: 946 816 558 telefonora deitzea, lagunak@anboto.org helbide elektronikora idaztea, anboto.org webguneko formularioa betetzea edo ANBOTO astekarian dagoen kupoia bete eta Bixente Kapanaga,9  Iurreta, helbidera bidaltzea.

 

Koldo Zarate (Durango): "Proiektuan sinesten dudalako egin naiz ANBOTOren lagun”

Zergatik hartu duzu ANBOTO babesteko kanpainan parte hartzeko erabakia?
Proiektuan sinesten dudalako egin dut kanpainarekin bat. Uste dut ANBOTOk eskualdeari asko laguntzen diola, eta, gainera, hori guztia euskaraz egiten du. Euskararen normalizazioan asko laguntzen du. Herri proiektu bat da, eta babestu egin behar dugu.

Zelan baloratzen duzu txartelagaz egiten den eskaintza?
Txartela orain dela gutxi jaso dut, beraz, oraindik ez dut erabili. Hala ere, ideia ona dela iruditzen zait. Bertako enpresa eta merkataritza bultzatzeko modu bat da.

Harpidedunak animatuko zenituzke?
Edozertan gastatzen dugu dirua, sarritan beharrezkoak ez diren gauzetan. Horrelako ekimen batek babesa behar duenez, sinestuz gero, ahalegina egiteak merezi duela uste dut.

 

Bidane Txopitea (Durango): "ANBOTO gustura irakurtzen dut eta merezi du bultzada bat ematea"

Zergatik hartu duzu ANBOTO babesteko kanpainan parte hartzeko erabakia?
Etxean ANBOTO jasotzeko gogoz egoten naiz, astero. Gustura irakurtzen dut, eta uste dut merezi duela bultzada bat ematea.

Zelan baloratzen duzu txartelagaz egiten den eskaintza?
Oraintxe egin naiz lagun, beraz, oraindik ez dut jaso, baina deskontuena ondo dago. Beste txartel batzuk ere baditut, baina ez ditut asko erabiltzen. ANBOTOrena berriz, eskaintza hain gertukoa izanda, bertako merkatari eta zerbitzuak izanda, uste dut errazago erabiliko dudala.

Harpidedunak animatuko zenituzke?
Egunkaria baino errazago irakurtzen dut ANBOTO. Nik neure buruari esan nion inguruko berriak jasotzeko balio duela, eta hori mantentzeko eta bultzatzeko, gauza guztien moduan, dirua behar dela.

 

Eneko Sagardoy (Durango): "Kazetariak ezagutzeak proiektuarekiko konfiantza ematen dit"

Zergatik hartu duzu ANBOTO babesteko kanpainan parte hartzeko erabakia?
Herri komunikabide bat denez, eskualdeko berriak inork baino hobeto jakingo dituela, eta hala kontatuko dizkidala uste dudalako. Kazetariak ezagutzeak eta herrian ikusteak proiektuarekiko konfiantza eta hurbiltasuna ematen dizkidate. Hezur-haragizkoak dira, ez daude bulego batean, dorre batean.

Zelan baloratzen duzu txartelagaz egiten den eskaintza?
Txartela bide berean doa: herri komunikabideak herri komertzioa sustatzen. Hurbileko harremanak indartzen laguntzen du txartelak.

Harpidedunak animatuko zenituzke?
Guk irakurtzen ez badugu, inork ez duela irakurriko esango nieke. Konfiantzazko informazioa, zuzena  eta benetakoa gura badugu, ANBOTO lakorik ez dago.