Euskarak 365 Egun

Euskaraz mingainari eragin guran, 200 lagun bildu dira Mintzodromoan

Irakurriz ikasten den moduan irakurtzen, berbetan ikasten da euskaraz. Praktikatuz, alegia. Ildo horretatik, euskara ikasten diharduten euskaldun berriak eta euskaldun zaharrak batuz, Mintzodromoa antolatu zuten, atzo, Durangoko Plateruena kafe antzokian. Goizez eta arratsaldez, saio bikoitza proposatu zuten antolatzaileek. Kafesneak eta pastek gozotu zuten mahaiaren bueltan eseritakoen solasaldia.


San Antonio Santa Rita, Kurutziaga eta Ibaizabal ikastetxeetako gazteez gainera, AEK eta Udal Euskaltegiko ikasleak batu ziren, goizean, ekimenera. Guztira, 122 lagun elkartu ziren mingainari euskaraz eragiteko gogoz.

Gazteak urduri, non eseriko, eta euskaltegietako ikasleak ere gogotsu ibili ziren, aulki bila. Laukote horietako baten  solasaldian  infiltratu zen ANBOTO. Isabel Perez AEK-ko ikaslea, Julen Bengoa Udal Euskaltegiko ikaslea, Nerea Narbaiza San Antonio Santa Ritako 4. DBHko irakaslea, eta Jon Barbero eta Gaizka Bengoa Kurutziaga ikastolako ikasleak bildu ziren lehenengo errondako talde batean. Berbetan hasi aurretik, aurkezpenen txanda izan zen. Kurutziagako ikasleak eta San Antonio Santa Ritako irakaslea euskaldun zaharrak dira. Isabel, berriz, AEKn euskara ikasten dabil. Berbalagunera joateko astirik barik dabilela aitortu zuen. Julen, berriz, euskaldun zaharra da, baina EGA titulua ateratzeko ikasten dihardu, Udal Euskaltegian. Talde anitza batu zen, beraz, euskaraz hitz egiteko gertu.

Antolatzaileek proposatutako lehenengo gaia musikari lotutakoa izan zen. Guztiaren errua reggaetoiak dauka izan zen esku orrian azaltzen zen lehenengo  esaldia. Taldekideek berehala ekin zioten musika mota ezberdinei buruz hitz egiteari. “Momentu bakoitzean, norberaren egoeraren arabera, gorputzak musika bat edo beste eskatzen dizu”, arrazoitu zuen Julenek. Ikasleek ere, musika gogoko dutela azaldu zuten, talde zehatzik barik, euskal musika zein atzerrikoa. Reggaetoia, berriz, ez ei dute larregi ezagutzen. Nereak, berriz, irakasle senagaz, solasaldia bideratzeko galderak proposatu zituen. Halako batean, txirrinak jo, eta beste solaskide batzuk ezagutzeko txanda heldu zen. Txandatzearen bidez, beste mahai batean esertzeko unea zen. Horixe baita Berbalagunen oinarria. Euskaraz hitz egiteko aukera eskainiko dizun jende berria ezagutzea.