Amankomunazgoak eta Durangoko adinekoen sailak sustatu dute egunaren ospakizuna, baina nagusien elkarteek inoiz baino ardura gehiago eduki dute antolaketan. Durangaldean, 15 elkarte daude une honetan, guztiak herri mailakoak, Bizidun izan ezik. Bizidunekoek zahartze aktiboaren inguruko ekintza ugari egiten dituzte urtean zehar, eta horien artean, mendi ibilaldiak daude. Horrela, eurek antolatu dituzte urriaren 1eko ibilaldiak. Durangon hiru hasiko dira Andra Maritik, 08:30ean, 09:30ean eta 10:00etan. Atxondon, Elorrion eta Zaldibarren, 08:30ean irtengo dira; Berrizen, 08:45ean, eta Abadiñon, 11:00etan. Andra Marira guztiak ordu antzekoan heltzeko asmoa dute.
Bestalde, martitzenean, adinekoen arazoen inguruko berbaldia egongo da Durangoko Elkartegian, 17:30ean.