Txakartegik ikastaroen balioaz berba egin zuen: “Jendeari, lana bilatzeko prozesuan, asko laguntzen diote”. Datu zehatzei begiratuta, ikastaroak hiru arlotan banatuta eskaini zituzten. Batetik, langabetuentzako bi ikastaro zeuden: zerbitzari izateko ikastaroa, eta pertsonak zein zamak mugitzeko makineria erabiltzen ikastekoa. Bigarrenik, gaitasun orokorrak hobetzeko hamar ikastaro eman zituzten; lan elkarrizketak prestatzen eta curriculumak egiten ikasi zuten, besteak beste. Hirugarrenik, 55 urtetik gorakoek ikastaro bitan parte hartu ahal izan zuten, gizartean haien parte-hartze aktiboa bultzatzeko helburuagaz.
Txakartegik kontatu zuenez, partaideen %56 emakumeak izan ziren, %36 29 urtetik beherakoak, eta %38k atzerriko naziotasuna zeukaten.
Orientazio zerbitzua
Bestalde, irailaren 30era bitartean lanerako orientazio zerbitzua eskainiko du Behargintzak, Lanbidegaz lankidetza hitzarmena sinatu eta gero. 1.500 orduko zerbitzua izango da, lanbakoei zuzendua.