Saio partehartzaileak izatea da helburua, Durangaldeko Amankomunazgoko ordezkariek azaldu dutenez. "Horrela, talde bakoitzaren egoera, premiak eta iritziak ezagutzeko aukera izango dugu. Gainera, kirol arloan euskaraz dauden baliabideen eta materialen berri emango zaie". Hiru kirolari eta entrenatzailek gidatuko dituzte saioak: Belit Solar, Iraia Garcia eta David Garciak.
Durangoko Merinaldearen Amankomunazgoko Euskara Zerbitzuak gizarte hainbat arlotan euskara sustatu eta normalizatzeko Euskara Biziberritzeko Plan Nagusia (EBPN) onartu zuen 2012an. Plan horretan batutako ildo estrategikoetariko bat da kirola, eta horren haritik ipini dute martxan Euskara eta kirola sasoian programa.
Dinamizazio saioak amankomunazgoko herri guztietan eskainiko dituzte, eta bakoitzean sortutako beharrizanen arabera emango dira Euskara eta kirola sasoian kanpainaren hurrengo pausoak.