Durangaldearen historia ezagutzeko hainbat ekitaldi datozen egunetan

Anboto 2012ko abe. 27a, 10:29

Merinalde Egunaren barruan, gaur \'Duranguesado: cruce de caminos\' izeneko antzezlana eskainiko dute Elorrion.

Merinalde Egunaren barruan, gaur, abenduak 27, Duranguesado: cruce de caminos izeneko antzezlana eskainiko dute Elorrion. Zaragozako Los Navegantes konpainiak eskainiko du antzezlana Elorrioko San Agustin Etxebarriko baselizan, 19:30etik aurrera.

 

Bihar, abenduak 28, Durangaldea, historia laburrean izeneko liburua aurkeztuko du Gerediaga elkarteko Jon Irazabalek. Aurkezpena Durangoko Kurutzesantu museoan izango da, 19:30etik aurrera. Azkenik, zapatuan Durangaldeko Teila Saria banatuko du Gerediagak. Durangaldetik kanpoko herritar bati eskaintzen dio Gerediaga elkarteak, bi urterik behin, Durangaldeko Teila saria. Aurten, Muskizen jaiotako Iñaki Garcia Caminok jasoko du. Eskualdearen alde egindako lana eskertuko diote Garcia Caminori, abenduaren 29ko Gerediagako Foru Zelaiko ekitaldian, 12:00etan. Historian doktorea da Iñaki Garcia Camino, eta besteak beste, Iurretako Amatzako San Martin eta Garaiko Momoitioko San Juan baselizetako eta Elorrioko Argiñetako indusketak burutu ditu. Garcia Camino Bilboko Arkeologi museoko zuzendaria da, gaur egun.

 

Merinalde Eguna

 

Gerediaga elkarteak eta Bizkaiko Batzar Nagusiek elkarlanean antolatutako  Merinalde Eguneraren barruan sartzen dira ekitaldi guztiak. "Gure lurraldetasuna eta berezko erakundeak gogoratzeko" antolatu dute Durangoko Merinalde Eguna. Izan ere, Gerediagak gogorarazi duenez, 1875eko abenduaren 27an bildu ziren azkenengoz Durangaldeko elizateetako alkateak Gerediagako Foru Zeilaian. Hurrengo urteko uztailean kendu zituzten foruak, eta eskualdetako erakundeak desargertarazi.

 

Aurten, urteurren hori ezezik, beste bat ere hartuko du Merinalde Egunean Gerediagak gogoan: azaldu dutenez, "abenduaren 29an beteko dira 800 urte Durangaldeak eta Bizkaiak historian elkar bidea hasi zutela". Durangoko lurrak Alfontso VIII.a Gaztelako erregearen menpe egon ziren 1200. urtera arte, baina Navas de Tolosako gudaldian eskainitako laguntza eskertzeko Diego de Haro II.a Bizkaiko jaunari eskaini zizkion 1212an.

 

 

 

 

ANBOTOKIDE izatea gure komunitatearen parte izatea da, euskararen erabilera sustatzea eta herrigintzaren aktibazioan pausoak ematea.


EGIN ZAITEZ KIDE!