Publiko ez diren euskarazko 52 hedabideek osatzen dute elkarte berria.
Indarrak batzea. Horixe da atzo Donostian aurkeztu zuten Hekimen euskarazko hedabideen elkartearen helburua. Aurkezpenean azaldu dutenez, “euskal hedabideen elkarlana bideratzera dator Hekimen”, Gaineratu dutenez, “euskararen hiztun komunitateak behar duen eremu komunikatibo sendoa garatzera dator”. Proiektuan bat egin duten hedabideen ezaugarri nagusiak, euskara hutsez jardutea eta publikoak ez izatea dira. GipuzkoaBerritzenen laguntzarekin, lanean aritu dira elkarrekin eta elkarte hau da haren “fruitu”.
Desafioak ez dira makalak. Esaterako, egunotan ari da eratzen Eusko Jaurlaritza eta haren ordezkariekin harreman finkoa bideratzeko asmoa dute: “Serio berba egin beharko dugu diru-laguntzez, publizitate instituzionalaz, mintzakidetza iraunkorraz, etab.”.
Parte-hartze zabala
Argia, Berria, Euskal Irratiak, Gaur 8, Gazteberri, 11amaika Telebista, Tokikom eta Xaloa Telebista dira Hekimenen kide. Anboto Komunikabideak-ek Tokikomen bazkide den heinean, egitasmoagaz bat egin du. Guztira 52 hedabide batu dira elkarrekin bideari ekiteko asmoz.
Besteak beste, Euskal Hedabideen Behatokia sortu nahi du, Hekimenek, unibertsitateak, instituzioak, eta hedabide publikoak bilduko dituena. Ikerketa jorratuko duena, audientziak,teknologia berriak, beste hizkuntzetako esperientziak aztertuko dituena.