Durangaldeko hainbat herritarrek irtengo dute, urtero legez, kopla kantuan.
Giro hotzari aurre eginez eta usadioari eutsiz, Santa Ageda koplak abestera irtengo dute, zapatuan, Durangaldean ere. Eskualdeko txoko eta bazterrak epelduko dituzte koplaz kopla.
Mañariarrak izango dira kopla-kantaririk goiztiarrenak, Santa Ageda bezperaz: 08:45ean egin dute hitzordua plazan, eta batutako dirua Saharara bidaltzeko janaria erosteko erabiliko dute. Iurretan, berriz, 10:00etan geratu dira Aita San Migel plazan, eta Mallabian 11:30ean Petrilean: Mendibil abesbatzak baserriz baserri egingo du kantuan iluntzera arte.
Arratsaldez ere irtengo dute
Atxondon 14:30ean elkartuko dira kantariak –batutako dirua Caritasera bideratuko dute– eta Elorrion ere bai: 18:30ean egin du hitzordua Lagun Tokin, Iturrizoro elkartearteak.
Durangon, berriz, Orfeoiak abestuko dituk Santa Agedaren tradiziozko koplak, zapatuan. Kili-kolo aurretik abiatuko dira 18:30ean, eta Klarisen komentuan, Andra Marian, Ezkurdiko arkupeetan, Plateruen plazan eta Goienkalen abestuko dutela iragarri dute.
Berriztarrak 18:00etan hasiko dira kantuan; mojen komentu aurrean egin dute hitzordua –kasu honetan, batutako dirua euskal presoen senideei laguntzeko erabiliko dute. Zaldibarren, berriz, 17:30ean abiatuko dira Koral elkartetik. Abadiñon, azkenik, Done Zezili abesbatzak abestuko ditu Santa Ageda koplak kalez kale; iluntzeko 19:30ean hasita izango da.
Otxandion Oihandi abesbatza baserrietatik ibiliko da lehenengo eta auzogunetik gero. Ondoren, elkarrekin bazkalduko dute.