Elurra mara-mara ari da goizetik Durangaldean. Herrizaingo Sailak alerta laranja ezarri du gaur eta bihar izotzagatik eta elurragaitik. Eusko Jaurlaritzak 19:08an jakinarazi duenez, Urkiolako mendatea zabalik dago turismo, kamioi zein ibilgailu artikulatuentzat, baina derrigorra da kateak erabiltzea. Oraindik elurra ari du Urkiolan.
AreItio, Kanpazar, Muniketa eta Trabakua ibilgailu guztientzako zabalik daude, baina arretaz gidatzeko eskatu dute. Trabakuan elurra ari du. Egoera unean-unean ikusteko: Mendateen egoera
ARGAZKITEKA atalean Elorrio, Apata, Iurreta, Abadiño, Otxandio, Berriz eta Pol-Poleko argazkiak ikusi daitezke.
EKITALDIAK: Otxandioko Euskaldunon Amaraunek jakinarazi duenez, Otxandion gaurko programatuta zegoen TELP hitzaldia atzeratu egin da elurraren ondorioz. Otsailaren 16an egingo dute, 19:00etan, Kultur Etxean. Abadiñon udal arduradunek jakinarazi dutenez, elurrak ez du inolako aldaketarik eragingo San Blas jaietan. Bestalde, Bizkaiko Foru Aldundiak erabaki du bertan behera uztea Eskola Kirola programak astebururako aurrez ikusita zituen jarduera guztiak. Beraz, ez da kirol jarduerarik izango otsailaren 4an eta 5ean.
Hona penintsula osoko imagina satelitetik hartuta 15:00 inguruan.
EGOERA DURANGALDEKO HERRIETAN
Durangon edurra hasi baino lehen gatza bota dute, batez ere, kale eta errepide nagusietan, eta aldapatsuetan. Neurrion berri eman zuten azken udalbatzarrean, iragarritako hotz handia eta elurra dela-eta. Ezkurdi plazan, anbulategiko sarreran eta ikastetxeetako sarreretan ere bota dute gatza, eta DYA eta Gurutze Gorriko sarreretan ere bai. Bestalde, elurra kentzeko traktorea lan egiteko prest daukate premia egongo balitz, eta langileak hornituta daude elurra kentzeko. Beharrezkoa izanez gero oinezkoen guneetan ere botako dute gatza.
Atxondon, elur eta izotzari aurre egiteko gatz zakuak jarri ditu eskuragarri Atxondok. Datozen egunetarako iragarrita dagoen hotz siberiarrak errepidean, baserri bideetan zein inguruetan eragin ditzakeen lurzoru izoztu edo elurtuei aurre egiteko gatz zakuak banatuko ditu Atxondoko Udalak. Jakinarazi dutenez, zakuak Apatako Maisuen Etxean egongo dira eskuragarrari, denboraleak irauten duen egun denetan. Zakuak jasotzeko ordutegia ere zehaztu dute: 08:00etatik 15:00etara. Hala ere, interesatuek lehenengo udaletxera deitu beharko dute (94 682 10 09) eta bertako langileekin hitzordua ipini, ondoren zakuak jaso ditzaten. Baserrri edo etxe bakoitzak jaso dezakeen kopurua ere mugatua da, ahalik eta eskari gehienak asetzeko: zaku bi jaso daitezke bizileku bakoitzeko.