Gaur arratsaldean etxerako itzulera aurreratzea eta joan-etorriak saihestea gomendatu du Trafiko Zuzendaritzak

Dagoeneko elurra botatzen dabil Urkiola eta Kanpazarren. Arratsalderako egoerak txarrera egitea itxaroten dute. Datozen orduetarako iragarri dituzten elurteak direla-eta, Eusko Jaurlaritzako Trafiko Zuzendaritzak \"ahal den neurrian lehenago etxeratzea eta errepide bidezko joan-etorriak saihestea\" gomendatu die gidariei. Dagoeneko elurra botatzen ari da EAEko errepide-sare nagusiko hainbat tokitan, baita bigarren mailako errepide eta mendate gehienetan ere, Urkiolan edota Kanpazarren esaterako. Hala ere, errepideak zabalik daude momentuz. Euskalmetek egindako iragarpenen arabera, elur-kota 0-100 metroren bueltan kokatuko da, eta prezipitazio arinak botako ditu.