Ricardo Blazquez, Joan Maria Uriarte eta Migel Asurmendi, Bilbo, Donostia eta Gasteizko gotzainek eta Mario Iceta gotzain laguntzaileak zapatuan, uztailaren 11n, 12:00etan, Gasteizko katedralean egingo duten hileta-elizkizun bateratuetara joateko autobus zerbitzua antolatu dute Durangaldeko Tabira eskualdeko parrokiek.
Gerra zibila irabazi zutenek lehenengo euskal apaizak fusilatu zituztela 73 urte beteko direla-eta antolatutako elizkizunean “oroimena garbitzera, egia zerbitzatzera eta barkamena eskatzera” gonbidatuko dute. Biltzar-buru Asurmendi izango da. Fusilatutako apaizetako baten senitarteko batek bertsoz oroituko ditu hildako 14 apaizak (bederatzi gipuzkoar, lau bizkaitar eta nafar bat).