Kalea langileen aldarrien oihartzunak beteko du bihar, Maiatzaren Lehenean. Sindikatu nagusiek hiriburuetara deitu dituzte langileak, bakoitzak bere aldetik. Horrela, ELAk Bilbon egingo ditu ekitaldiak, eta LABek Euskal Herriko hiriburuetan egin ditu deialdiak, Bizkaiko langileak Bilbon batuz; berdin egingo dute CCOO eta UGTk: biek ala biek, Bilbon egin dute deia; baita Gasteiz eta Donostian ere.
ELAren ustez, maiatzaren 21eko grebarako giroa “berotzeko” balioko du Borroka bidean lelopean ospatuko duen Maiatzaren Lehenak: “Nahikoa dela esateko eta patronalaren xantaiari aurre egiteko”. LABek Langileon borrokaz, Euskal Herriak aldaketa lelopean egin du langileriaren eskubideak aldarrikatzeko aldarria: “Horretarako arrazoiak sobran ditugu, gehiago krisia langileok ordaintzea gura dutenean”.
CCOO eta UGTk batera egin dute deialdia, Krisialdiari aurre egiteko: Empleo, inversión pública y protección social lelopean, eta “krisi ekonomikoaren testuinguruan, mugimendu sindikal eta langileentzat are eta indar handiagoa hartuz”. Bilgune Feministak kalera irtetera deitu ditu emakumek.