Gasteizerako autobus lineari proposamen bateratua

Durango eta Gasteiz lotzen dituen autobus linea egokitzeko proposamen bateratua landu dute Izurtza, Mañaria eta Otxandiok, Legutio eta Lukorekin batera. Garraio zerbitzu publikoa hobetzea eskatzen dute herriok, eta Jaurlaritzako Herri-lan eta Garraio sailburu Nuria Lopez de Gereñurekin ere batzartu izan dira. Linea hori ez dela Jaurlaritzaren eskuduntza esan die Lopez de Gereñuk, diputazioena baino.

Kasu horrek Bizkaiko eta Arabako diputazioetan eragin dezake: “Lurralde biren arteko errepidea denean, diputazioetako batek hartu ohi du ardura; normalean tarte handiena hartzen duen lurraldekoak, azaldu digutenez”. Halaxe azaldu du Otxandioko Santi Uribe zinegotziak. Arabari dagokiola uste dute, beraz. Sailburuak diputazioekin hartu-emanean jarriko dela ere agertu ei die.

Proposamena

Honako irteerak proposatu dituzte Gasteiztik: 07:00etan, 08:00etan, 09:30ean, 11:15ean, 17:00etan eta 18:15ean; baita orduro ere, 12:30etik 15:30era eta 19:30etik 21:30era. Durangotik urtetako, berriz: 06:30ean, 07:15ean, 08:15ean, 10:45ean, 12:15ean, 13:45ean, 15:00etan, 17:15ean, 19:00etan, 21:30ean eta 22:45ean.
Zapatu eta jaiegunetarako, Gasteiztik honako irteerak proposatu dituzte: 08:00etan, 12:30ean, 16:30ean, 20:00etan eta 21:30ean; Durangotik, berriz, 09:15ean, 15:00etan, 18:15ean eta 21:30ean.