Aho batez, horrelaxe erabaki du Konstituzionalak aipatu alderdiek aurkeztutako babes eskeko helegiteak atzera botatzea. ANVk 133 zerrenden baliogabetzearen kontra jarri zuen helegitea eta ASk, ordea, zerrenda guztien gainean jarri zioten baliogabetzearen kontra. Auzitegi Konstituzionalak Gorenaren erabakia berretsi du.
Beraz, EAE-ANVk aurkeztutako gainerako 123 hautes-zerrendek gainerako alderdi eta zerrendekin lehiatu ahal izango dute Euskal Herriko udal eta foru hauteskundeetan, Estatuaren abokatuak eta Fiskaltzak horien aurkako inpugnaziorik ez baitzuten aurkeztu.Hartutako erabakia 00:30ean eman dute Konstituzionaleko 1. salako sei magistratuek. Maria Emilia Casas, Roberto Garcia Calvo, Jorge Rodriguez Zapata, Javier Delgado, Manuel Aragon eta Pablo Perez Tremps epaileek hartu dute erabakia.
Konstituzionalak onartu ditu Estatuko Fiskaltzak eta Abokatutzak aurkeztutako alegazioak. Asteburuan Auzitegi Gorenaren 61. Salak Abertzale Sozialisten kasuan kaleratutako baliogabetze epaia eta ANVren kasuan autoa berresteko eskatu zion Ministerio Publikoak Auzitegi Konstituzionalari.
85 orriko epaian, Auzitegi Konstituzionalak dio inpugnatutako zerrendetan Batasunarekin zerikusia edo harremana duten pertsonak daudela eta horrek Batasunaren "estrategia" dela, hau da, Batasunak zerrenda horiek "instrumentalizatu" dituela frogatzen duela.