Eskualdeko enpresen finantza-kudeaketa eta finantzaketari buruzko interes handieneko gaiak jorratu guran, Durangaldeko enpresei —batez ere, enpresa txiki eta ertainei (ETE) begira— zuzendutako Finantza Trebakuntza Plana jarriko du martxan Elkargi Elkarrekiko Garantia Elkarteak, asteon bertan hasiko den finantza jardunaldi ziklorekin. Landako Elkartegian izango dira jardunaldiok: azaroaren 15ean, 22an eta 29an, hain zuzen ere, 18:00etatik 20:00etara. Enpresen asistentzia doakoa da, eta dagoeneko, 45 enpresek eman dute izena. Bankuekin zelan negoziatu, Merkatuko finantza-linea eta laguntza onenetara zelan iritsi eta Kostuak nola inputatu, kudeatu eta kontrolatu, gai horiexek jorratuko dituzte, hurrenez hurren.
Kontseilari delegatu Jesus Alberdik eta Kontsultoretza eta finantza-zerbitzu saileko arduradun Esteban Herediak nabarmendu dutenez, trebakuntza finantzarioan “erreferente” da Elkargi, eta ekimen horren bitartez, “eszenatoki ekonomiko-finantzarioan emandako aldaketei aurre egiteko, enpresek, eta batez ere, ETEek, duten ahalmena handitzea” da helburua: “Euren finantza-kudeaketa, lehiakortasuna, hobetzeko sortutako aukera eta alternatiba desberdinak ezagutu eta horietara heltzea”.