Zazpirak inguruan elkartuko dira gaur gaztetxean Hiltegixen hamabosgarren urtebetetzea ospatzeko. Txokolatada egingo dute bertan, eta hamabost urteotako ekintzen argazki erakusketa ipiniko dute. Asteburu osoan izango da erakusketa gaztetxean, eta zapatuan kalera aterako dute.
Bihar iluntzean galaz jantzita batuko dira afarirako. Aurretik, jolas-poteoa egingo dute Berrizko tabernetatik, eta afal ostean, inprobisazioagaz jolastuko dute Inproborroka lehiaketan. Publikoak ipinitako baldintzekin eta irudimena erabilita ibiliko dira lehian talde bi. Gaua Dj Roberrekin dantzan amaitzeko asmoa daukate Hiltegixen.
Zapatuan Kokein eta On taldeen kontzertuak edukiko dituzte gaztetxean, 22:30 aldean, eta ohitura hartu dutenez, bokadillotxoak egongo dira salgai afari-kopua egiteko. Domekan 1990eko okupazio mugimenduari buruzko dokumentala eskainiko dute 19:00etan.
Hamabosgarren urteurrenerako, Berrizko gazte asanbladak urteurrenerako kamisetak atera ditu, eta salgai daude 8 eurotan.