Gaur goizean 2023ko aurrekontuak onartzeko osoko bilkura egin dute Atxondon eta EH Bilduko zinegotziek salatu dute beraiei deialdirik bidali gabe ospatu dutela bilkura. "Pleno horren baliogabetasuna eskatu dugu, ez delako legeak eskatzen duena bete: deialdiak 48 orduko aurrerapenaz jaso behar dira", azaldu dute. "Gutariko inor ez dela aurkeztu ikusita ere, plenoa ospatzeak zer pentsa ematen digu. Momentuan, konprobatzeko bada ere, ez dute telefono dei bat egiteko interesik izan. Eta aurrera jarraitu dute. Udal honen funtzionamenduaren beste adibide bat izan da gaurkoa", kritikatu diote EAJri.
Gobernu taldeak, berriz, akats bat egon dela onartu du, eta datozen egunetan beste bilkura bat deituko dutela iragarri du.