Udaleko brigadak dauka garbiketaren ardura. Gaur egun, hiru lagunek osatzen dute. Sasoi batean, orain 9 urte, zazpi ziren. Baina, Atxondo lako udal txiki batentzat gehiegi zela dio Cobosek: “Nominetan udaleko aurrekontu ia osoa joaten zen. Ez zen, ez bideragarria, ez logikoa. Izan ere, Herriko beharrizanetarako gehiegi ziren”.
Orain, tamainaz antzerakoak diren beste herri batzuetako jende kopurua dute. Beharbada, hiru lagunekin “justuan” dabiltzala onartu du, baina gaur eguneko udalaren errealitateak ez duela beste bat batzeko adina ematen. Autokritika egin ostean, gizabide arazo bat ere badagoela gaineratu du. Esaterako, “jendea ohituta dago trasteak ateratzen Amankomunazgoko arduradunak noiz igaroko diren kontuan hartu barik”. Gizabidea ere jorratuko beharreko alderdia dela dio.
Herriguneko landetako belarra mozteko, enpresa bat kontratatu dute aurten, eta arlo hori hobetu dela uste du. Gainera, modu horretara, brigadakoek “denbora gehiago izan dute udan zehar beste zeregin batzuetarako”.