Aurreko urteetan 1.000 kilora arteko gatz zakuak ipini izan dira herriko hainbat kokagunetan, bai udal langileek zein herritarrek eskura izateko edurra edo izotza egiten zuenean. Zakuek, baina, “itxura eskasa zuten eta, ganera, euriagaz gatza urtu egiten zen”, udal ordezkariek adierazi dutenez. Herritarrekin egiten diran auzo batzarretan horren ganeko kexaren bat zegoela-eta gatza modu txukun eta ikusgarriagoan gordeta izateko, udalak lau edukiontzi ipini ditu Apatan (posta bulego ondoan), Axpen (eliza ostean), Arrazolan (Elizondoko aparkalekuan) eta Santixan (zabor edukiontzien ondoan).
Edukiontzi bakoitzean 500 kilo gatz sartzen dira eta herritarrek behar dutenean gatza hartzeko aukera izango dute, nork bere pala eta zakuak eramanda. Hustu ahala, udal beharginek gatz gehiago ekarriko dute. Udalak 2.000 eurotako inbertsioa egin du edukiontzi berriekin.