Pilotariak hiru mailatan banatu dituzte. Txapelketa da, baina liga bateko egitura du, igoerak eta jaitsierak ere izaten direlako. Arrazolako pilotalekua txikia eta berezia da, eta horrek xarma berezia ematen die partiduei Ibai Buruaga kudeatzaileren esanetan: “Joko arina da, eta fisikoki exijentea. Pilotalekuaren berezitasunagatik lege propioak ditugu; esaterako, harmailak gertu daudenez, handik bueltan jo daiteke pilota”.
Oier Jaio eta Gaizka Amiano lehen eta bigarren aldiko irabazleak dira, hurrenez hurren. Iaz elkarren kontra jokatutako finala Amianok irabazi zuen. Batak zein besteak txapelketan sortzen den giroa azpimarratu dute: “Badaude hainbat herritar, txapelketa baino lehen elkar agurtu arren, elkar ezagutzen ez zutenak, eta, orain, ostera, partiduak jokatzeko geratzen dira. Txapelketako gauzarik onena sortzen den giroa da, ez dago hori ordaintzeko dirurik”, azaldu du Amianok. Lehia sanoa ere bada osagaietako bat.
Finalak irailean izango dira. Irabazleek txapela jantziko dute, eta eguneko bazkaria eta parranda dohainik izango dituzte.