Mendi irteera, jolasak, antzerkia eta musika kontzertuak egongo dira, besteak beste.
Marixurrike aisialdi taldeak Atxondoko I. Udazken Jaia antolatu du zapatu honetarako. Mendi irteera bategaz ekingo diote egitarauari: 09:00etan, 10 urtetik gorakoekin Artolara irteera egingo dute. Asuntze mendi taldeak antolatu du ekimen hori.
Ondoren, 12:00etan, 2-5 urte artekoentzako jolasak egingo dituzte eta 6-10 urte artekoak herriko txokoren batean ezkutatuta dagoen altxorraren bila ibiliko dira. Hainbeste ariketa egin ostean, 14:30ean, bazkari herrikoian batuko dira arratsaldeko ekimenei begira indarberritzeko. Txartelak Gaztetxean daude salgai (nork bere platerak, edalontziak… ekarri beharko ditu bazkarira).
Arratsaldeko 16:00etan antzerki saio bat izango da ikusgai eta ondoren gazteentzako akrobazia saioak egongo dira. Udazken Jaiari amaiera emateko, 20:00etan, herriko gaztetxoek kontzertuak eskainiko dituzte Gaztetxean.
Egun guztian zehar Marixurrikeko kamisetak salgai egongo dira eta sorpresa ugari ere prestatu dituzte.