Lehergaia bidoi batean aurkitu du Ertzaintzak. Amonala eta
soka detonatzailea zuen bidoia abandonatutako ibilgailu baten ondoan
zegoen. Lehenengo datuen arabera, abenduaren 23an Zornotzan aurkitutako
zuloarekin lotura izan dezake.
Ertzaintzak berehala erabiltzeko moduan zegoen ia 100 kiloko lehergaia
aurkitu du, gaur eguerdian, Atxondoko bailaran. Lehergailua
(gehienbat beste sustantzia lehergailurekin indartutako amonalez
egindakoa), bailara horretako parking batean aparkatutako Rover motako auto batetik
gertu zegoen.
Ibilgailuak susmoak sortu zituen toki berean denbora luzez aparkatuta
egoteagatik. Barrukaldea miatzean agenteek sustantzia batek sortutako
zikinguneak ikusi dituzte eta, beharrezko azterketak egin ondoren,
lehergailuak egiteko erabiltzen den sustantzia kimiko batenak zirela
ohartu dira.
Ertzaintzak
uste duenez, autoa abenduaren 23an Zornotzan aurkitutako zuloarekin
erlazionatuta dago. Orduan, 60 kilo lehergai aurkitu ziren mendi
batean. Iturri horren arabera, zuloa egin zutenek orduantxe utzi
zituzten ibilgailua eta bidoia Atxondon, izan ere, Zornotzan agertutako
material igual batzuk aurkitu dituzte Atxondon ere.
Autoaren maletategian faltsututako matrikula plakak
aurkitzeaz gainera, objektu ezberdinak aurkitu dituzte, tamaina
txikiko harriak barne, ustez metraila bezala erabiltzeko.
Lehergaia
aztertu ondoren, adituek bidoia bera berehala erabiltzeko moduan zegoela baieztatu dute, detonatzailea soilik falta zitzaion.
Autoa Ertzaintzaren
dependentzietara eraman dute adituek azterketa ezberdinak
egin ditzaten.