Itxiera gatazkatsua izan da langileekin, eta LABek egoera salatu du. Sindikatuaren ustez, Dendak Baik “txarto gestionatu du”, eta udalaren partetik “utzikeria” egon dela kritikatu du.
Kobratu barik
Beharginak lanera bueltatzeko eskatzeko, LABek protesta egin du goizean, udaletxe parean. Bost lagun egon dira tabernan beharrean, eta, sindikatuaren arabera, azken hilabete bietan kobratu barik egon dira. Horregatik, dirua bueltatzea eskatu dio Dendak Bairi. Baina sindikatuaren kritika hori baino sakonagoa da. Alfonso Aranguren ordezkariak azaldu du zor zitzaiena baino postu baxuagoan egon direla baloratuta; hau da, zerbitzariei dagokiena beharrean laguntzaileei dagokiena ordaindu dietela.
LABen iritziz, azken hil bietako egoerak “tentsioa eta estresa” sortu ditu beharginengan, eta gestioaren arduradunak jo ditu errudun. Arangurenek kontatu duenez, datorren astelehenean batzartuko dira Dendak Baigaz. Udalaren berririk ez dute izan, eta, EH Bilduren bidez udalbatzarrean gaia komentatu arren, sindikatuak ez du erantzunik jaso.
Adjudikatzeko moduaz
Bestalde, zerbitzua adjudikatzeko udalak erabilitako modua kritikatu du Alfonso Arangurenek. Udalari egotzi dio “haren nahiaren arabera eta ezkutuan ibilita” adjudikatu izana. Prozedura horren kontrara, taberna publikoaren kudeaketa udalak zuzenean eraman dezala exijitu du LABeko ordezkariak, eta kalera botatako beharginak berriro kontratatu ditzala ere bai.