PSE-EEko Pilar Ríosek prentsa ohar bidez azaldu du obra udala "informatu eta galdetu barik" diseinatu dutela, eta horregatik "hutsune larriak" dauzkala. Garrantzitsuena, biribilguneak Gasteiz Bidea kalera ez duela irteerarik edukiko. Aldundia kritikatu du zinegotziak, eta kezka agertu du EAJk gobernatzen dituen bi erakundeen artean "komunikazio falta" egoteagatik. Ríosen berbetan, gobernu taldeari "ahalik eta arinen" Aldundiagaz hartuemanetan ipintzea eskatu diote, proiektuari aldaketak egiteko.
Ríosek gogoratu du Tabirako biribilgunean 92 istripu gertatu izan direla orain arte, hiru pertsona hil eta beste hiru larri zaurituta. Horregatik, "puntu beltza" dela esan du. "Aldundiak jakin du zelako arriskua eta funtzionamendu txarra eduki dituen biribilguneak, eta durangarrak arriskuan ipintzen ibili da".
