Madrilek asmoa du herri administrazioko legea aldatzeko. Saiatu izan da, eta zirriborro bat ere prestatu izan du, baina momentuz berriz gorde du, jaso duen kritika zaparradagatik. Proposatzen zuten 5.000 biztanle baino gutxiago duten herriak eta mankomunitateak desagertzea. Pentsatu dute horrela herri mailako estruktura arindu eta kostuak gutxituko direla. Gure eskualdean 9 udalerri desagertuko lirateke; Otxandio, Mañaria, Izurtza, Iurreta, Garai, Berriz, Zaldibar, Mallabia eta Atxondo. Desagertu ezean, euren eskumen asko, urbanismoari dagokiona adibidez, Foru Aldundiaren esku geldituko litzateke.
Badakit esango dutela Madrileko gobernuak gure lurraldean ez duela arlo horretan eskumenik. Irakaskuntzan ere ez, baina… Ikusten dugu beti topatzen dutela bideren bat pentsatzen dutena aurrera eramateko. 2019an 4 udalerri Durangaldean? Ez nuke nahi, eta horregatik adi egon eta mugitu gaitezen berandu izan orduko, edo bestela Iurretarrei galdetu nolakoa den historia.