Ertzaintzak jakinarazi duenez, Opel Astra batek harrapatu zuen emakumea, eta Galdakaora eroan zuten zaurituta. Beranduxeago ospitalean hil zen 80 urteko elorriarra, zaurien eraginez. Bizkaiko Trafiko Unitateak atestatua zabaldu du istripuaren nondik norakoak argitzeko.
Udalak ohar ofiziala kaleratu du gertaeragatik atsekabea agertzeko eta hildakoaren hurkoei doluminak emateko. Gainera, "gidarien eta oinezkoen arteko oreka egokia bermatzeko", auto gidariei arauak errespetatzeko eskatu die: "Ezinbestekoa da bide bakoitzean baimendutako gehieneko abiadura eta seinale bertikalak zein horizontalak zorrotz errespetatzea".