Atzo, 11:00ak aldera, Alde Zaharreko bizilagun bat Durangoko Udaltzaingoaren bulegoetara hurbildu zen Artekalen, emakume bati alokatuta daukan etxean txakur bat zegoela adieraziz. Durandog elkarteko arduradunekin ere berba egin zuen txakurraren egoeraz arduratuta.
Bizilagun honek agenteei azaldutakoaren arabera, txakurrak gutxienez zazpi egun zeramatzan bakar bakarrik etxe barruan. Udal ordezkariek azaldu dutenez, "udaltzaingoak etxebizitzan sartzea erabaki eta berehala baieztatu zuen animalia bakarrik zegoela. Pisua, animali-gorotzez beteta aurkitu zuten, txakurrarentzako janari eta edaririk gabe.
Udaltzainak eta animaliak biltzen dituen operarioa animaliaren kargu egin ziren eta albaitariarengana eraman zuten. Durandog elkarteko kideak ere txakurraren egoeraz arduratu dira.
Era berean, Durangoko Udaltzaingoak, diligentziak epaitegiaren esku jarri ditu, egin beharreko ikerketak martxan jarri ditzan.