Mendi bideetan jarritako trabak "oso arriskutsuak" direla ohartarazi dute Sapubike taldekoek, eta iaz izandako tranpa bat aipatu dute bereziki: pinu biren artean alanbre bat jarri zuten metro bateko alturan, eta horren eraginez, txirrindulari batek istripua izan zuen; "zorionez, ez zen larri zauritu, bizikletak kalte handiak izan zituen arren". Iazkoan, gaia hartzen zebilen seriotasuna ikusita, Sapubike taldekoek salaketa jarri zuten Ertzaintzan.
Aurten ere arazo bera izaten dabiltzala azaldu dute. Ekainaren amaierarako mendi bizikleta proba prestatzen hasi direnean ikusi dituzte lehen trabak. Harriak, makilak eta enborrak bidetik kendu, eta handik egun batzutara berriro leku antzerakoetan eta gehiagotan jarri dituztela kritikatu dute. Bidexketatik ibiltzen den edonorentzako arriskutsua dela adierazi dute, eta "benetan istripu larri bat jazo aurretik prentsara jotzea pentsatu dugu, denon artean horrelako delitu-jarduerak ea gera ditzakegun".