"Lokal bat utzi gura badute, izan dadila Batzoki bat edo Herriko Taberna bat, ez udal eraikin bat". Berba gogorrak izan ditu Juan Jose Gaztañazatorre PPko zinegotziak Kataluniako kontsultaren mozioaren harira. Bere ustez, mozioa ilegala da, eta horregatik bidaliko dio Urkijori, "beharrezko diren neurriak hartu daitezen".
"Falta zena, fartsa eta adarjotze baten partaide bihurtu nahi izatea", esan du Gaztañazatorrek. 'Estelada'-ren inguruan ere mintzatu da: "Legea bete eta bandera espainola ipintzeko arazoa eduki duten bakarrek, ez daukate erreparorik orain sektore politiko baten erreferentzia den bandera sektario bat igotzeko".