Kultura arloan auto-ekoizpenerako joera ugaritu egin dela eta, norbanako ekoizleentzako gune bat egokituko dute 49. Durangoko Azokan. Antolatzaileek azaldu dutenez, "norbere lanak ekoiztea erabaki duen sortzaileari edota elkarteari zuzendutako espazio berezitua izango da eta izena ematen duten guztien partekatua". Gune berrian parte hartzeko gehienez bi produktu erakutsi beharko dute sortzaileek.
Horrez gainera, aurten, erakusmahai erdia kontratatzeko aukera egongo da. Horretarako, gutxienez hiru produktu eduki beharko dituzte erakusgai, eta erakusmahaia norekin partekatuko duten azaldu beharko dute parte hartzaileek.
Aurten abenduaren 5etik 8ra izango da Durangoko Azoka. Izen-emate orokorra atzo hasi zuen Gerediaga elkarteak eta irailaren 30a izango da azken eguna. Auto-ekoizpeneko gunerako, datak beste batzuk dira: Irailaren 15etik urriaren 15era eman ahalko dute izena.
Durangaldeko argitalpenak
Urtero moduan, Gerediaga elkarteak eskualdeko sortzaile, elkarte eta erakundeentzako standa egokituko duela jakinarazi du, 'Durangaldeko argiltapenak' izeneko postuan, hain zuzen. Izena emateko Gerediaga elkartera jo behar da.