Andra Mariko iturria lekuz aldatzeko udalak hartutako erabakiaren kontra agertu dira hainbat auzokide. Joan zen astean iturria zigilatu zuten protesta ekintza batean. Azaldu dutenez, “ez da onargarria udaletxeak datozen asteetan iturri hau mugitzeko obra egiten hasi nahi izatea, taberna pribatu batek eskatu duelako eta beste inorekin kontatu gabe”.
Udal arduradunek diotenez, iturria terrazatik metro batzuk aldentzeko erabakia batzordean onartu zuten, erabiltzaileek eta terrazan daudenek elkarri enbarazurik ez egiteko. Udalak iturria konpontzeko asmoa duenez, leku aldaketa egiteko aprobetxatuko dute. Tabernak ordainduko du lekualdaketa.