Durangaldeko bi txirrindulari daude sarituen artean. Ziortza Isasi eta Markel Rodriguez. Isasi elorriarrak hainbat txapelketa irabazi ditu pistan Euskadiko selekzioagaz: 23 urtez azpiko mailan Espainiako txapelduna da puntuaketa, Madison, bakarkako jazarpen eta taldekako jazarpen modalitateetan. Gaursa Renault taldeko Rodriguez abadiñarrak, berriz, lehen mailako gaztetxoen torneoa irabazi du errepidean.
Durangaldeko hainbat taldetan dabiltzan txirrindulariak ere sarituko dituzte. Pistako Eustrak-Euskadi taldeko Tania Calvok, Ana Usabiagak eta Irene Usabiagak Espainiako hainbat txapelketa irabazi dituzte Euskadiko selekzioagaz. Horrez gainera, Calvo bigarren geratu da Europako txapelketako taldekako abiadura proban eta hirugarren 200 metrotan. Iurretako CAF Transport Engineering taldeko Amaia Lartitegik Euskaldun Torneoa irabazi du kadeteetan eta Bizkaia-Durangoko Lourdes Oyarbide hirugarren tokian geratu da elite mailan.