Merkatalgune berriak zabaltzeko Abadiñoko udaleko gobernu taldeak iragarri duen Arau Subsidiarioen aldaketa puntualaren kontrako iritzia agertu dute, Kaleartean Plataformako kideek, gaur, udaletxe aurrean, eskaini duten prentsaurrekoan.
Kaleartean Plataformaren ustez, "birkalifikazio honek aurrekari bat sortuko du enpresa handien ezarrera errazteko orduan", eta kritikatu dute, "udalak irizpide objektiborik barik" diharduela. Bestalde, enpresa handien irekierak, "etekinak handien artean banatzea" ekarriko duela azpimarratu dute: "Eurak baitira indartsuenak merkatuan".
Sinadura bilketa abian
Egitekotan, Arau Subsidiarioen aldaketa herri galdeketa bidez egin behar dela uste dute Kaleartean plataforman elkartutako norbanako eta eragileek. Horrelako egitasmo batek, "herriaren baimena" behar duela pentsatzen dute, "etikoki eta politikoki beharrezkoa" herri kontsulta bat burutzea.
Horregatik, Abadiñoko Udalaren osoko bilkuran herri-galdeketa egin dadin eskatzeko, sinadura bilketa abiatuko dute. Azaldu dute, bozkatzeko eskubidea duten abadiñarren %10aren babesa behar dutela eskaria udalera helarazteko.
Aurreratu dute, Traña-Matienan jaietan daudela aprobetxatuta, zapatu honetan, auzo horretan ekingo diotela sinadura-bilketari. Gainera, ekimenarekin bat egiten duten saltokietan eta enpresetan, eta Abadiñoko hainbat lekutan ere ipiniko dituzte sinadurak biltzeko guneak.