Abadiñoko Udalak Traña-Matienako garbiketa zerbitzua urte amaieran subkontratatzea erabaki du. Lanaren ardura lehiaketa bidez jasotzen duen enpresak 418.900 euro jasoko ditu. Matienan gaur egun garbiketan dihaduten hiru langileak baldintza beretan subrogatuko dituzte. Erabakia hartzeko udalbatzarrean, Independienteek eta EAJk alde bozkatu zuten.
Axier Garate jeltzaleak azaldu duenez, aurreko legegintzaldian neurri hau herri osoan hartzea proposatu zuten: "Garbiketa zerbitzua Traña-Matienan bakarrik subkontratatzean alkateak borondate politiko falta izan du". Igor Arkarazo zinegotziaren berbatan, "langileen eskubideen aurkako erabakia da". Berdintasun soziala alde batera utzi dutela salatu du Ezker Abertzaleak: "Orain enpresak jarriko ditu langileak kontratatzeko irizpideak. Independienteek herri politika beharrean auzo politika egiten dihardute". EAJren jarrera ere kritikatu dute: "Auzo politika horren kontra daudela diote, baina aldeko botoa eman dute".