Mikel Garitaonandiaren gizonek behetik gorako bidea egin dute aurten, eta igoerako play offetara sailkatzeko aukerekin heldu dira azken txanpara. Orain, denboraldiko une batzuetan urrun eta gaitz zirudien helburua lortzeko, lau final geratzen zaizkie aurretik.
Otsail hasieran Cambados talde galiziarren kontra etxean jasandako porrota inflexio-puntutzat hartu daiteke. Ligako talderik indartsuenetako baten kontrako porrota izanagatik, mingarria izan zen: 62-99. Orduan, gora baino, behera begira jartzeko arrazoi gehiago zeuden. Baina harrezkero jokatu dituzten zazpi partiduetatik bost irabazi dituzte. Denboraldian zehar taldea indartu duten jokalari berriek ere badute zerikusia taldearen gorakadan. Horrela, une honetan seigarren tokian daude Aceitunas Fragata Moron (Sevilla), Comercial Ulsa (Valladolid) eta Kia Automovil (Nafarroa) taldeekin hamalauna garaipenekin berdinduta.
Igoera fasera sailkatzen saiatzeko lau finaletako lehenengoa Granadan jokatuko dute, Coviran taldearen kontra, zapatu arratsaldean. Talde andaluziarra laugarren postuan dago eta azkenengo partidu biak galdu egin ditu.