Poligono sarreran, biribilgunearen ondoan elkartuko dira protestarako. Barikuan lanean zebilela hil zen langilea subkontratatua zegoela nabarmendu dute sindikatuek. 2015ean lan istripuz hildako lehen beharrgina izan da Zornotzakoa.
LAB, ELA, STEE-EILAS, HIRU eta EHNE sindikatuek deitu dute gaurko kontzentrazioa. Sindikatu hauek akordio bat dute langile bat hiltzen den bakoitzean elkarretaratze komunak egiteko. Lan istripuaren gaineko xehetasun zehatzak ezagutzeko Osalanen aurretxostenaren zain daudela jakinarazi dute. Ez dakite langilea hil zuen istripua zehatz zelan gertatu zen enpresa horretan "ez baitago ordazkari sindikalik".
LABek salatu duenez, "berriro ere ekidin zitekeen heriotz bat gertatu da, berriro ere subkontratatutako enpresa batean". Enpresako nagusiek eta administrazio publikoko kudeatzaile politikoek "egun gutxitan ahaztuko dute" jazoera, "beren zeregina gure lan postuetan gure bizitza eta osasuna bermatzea denean". Horren aurrean, LABek lan istripu horri "erantzun bat ematea exigitzen du eta arrazoiak ikertzeaz gainera arduradunak publikoki ezagutaraztea eta neurriak hartzea gertaera tamalgarri hauek berriro gertatu ez daitezen".
